تذكرونــــــها ؟!!!
أحـــب هالأغنيه والدعايـة من انا صغيرة أحس رمضان واحنا يهال غير
كان بيتنا أصغر وقنجتنا أصغر وسفرتنا حق أربع أشخاص بس
وكان أقصى أمانينا ان نقدر نطول التلفزيون
رمـــضان يعني "عادة عليكم" وحبابه وتشريبة وخبز عروق وهدى حسين وقرقيعان
وبو شنيتر ايييييي
اللي حتى اهوا ماسلم وصار جكن بكس هالأيام
للأسف حاشني برمضان وطافني القرقيعان
خافوا على اليهال مني
:(
التشريبه بينها وبين حبابه رابط كل ماشوفها تذكرني فيها
وأتـــعجب شلوون البقه تقدر تترس أربع جدور
فتره حبابة فتره ماتتعوض فتره البراءة
والدنيا الي ماتتعدى هموم بومبو واهيا ادور امها
ولاالسنافـــر ورحلتهم ويا شرشربيل
كبرنا وكبرت دنيتنا
ماصارت الحنة تعجبنا ولا المضاعد والجف الذهب ستايل
ماصارت العيديه غايه ولا صــــار شوبيز هدف
كل عمر له زهوته وكل مرحلة ولها بريقها وروحها
عمري ماحنيت للطــفوله ولا توقعت بوله عليها
كـــــثر ماني ولهانا عليها الحين
كبرت سفرتنا العامرة وكبرت قنجتنا وكبرنا ويهاهم
وصرنا نطول المكتبه ونغير التلفزيون
بس كل ماكبرنا كل ماسقف امانينا ارتفع
واتم الأمنيه الأغلى والأقرب دايما
ان عامود بيتنا يطول عمره أعــوام مديده
وسراي البيت ماينطفي نوره
وعسانا زايدين مو ناقصين
والله يتقبل منا ومنكم صـــالح الأعمـــال
ويعوده علينا وعليكم بالصحة والعافيه
أجمعـــــــــــين
ومن العايدين الفايزين
هناك 5 تعليقات:
تقبل الله منا ومنك صالح الاعمال
وعيد مبارك وكل عام وانتم بالف خير
و انتي بخير وصحه وسلامه
و الله يتقبل منا اجمعين
و عساج من عواده
واااي بوستج يبجي .. يااحلات ايام قبل بس .. بس جني مالحقت على كل هالسوالف مثل حبابه .. بس اعرفها;q
الحمد الله احنا لي الحينه عندنا بعض العادات موجوده مثل الحنه و طقتها
ياحلات ايام قبل ..
اي والله كنا على قدنا امنياتنا واحلامنا..حتى دنيتنا ماكانت جذي صعبه
شكرا على رحله في عالم الذكريات :)
كل عام وأنتم بخير
تقبل الله طاعتكم =)
تقبل الله طاعتج وعيدج مبارك
كل عام وانتي حبيبة قلبي
بخير وصحة وسلامه
لووووف يووو
إرسال تعليق