الأربعاء، 6 يناير 2010

SASSY MAMA



















((  وااااي كلش ماحسها بنتي جنها وحدا من خواتي ))

(( ماعرفلها احس اهيا بيبي وانا بيبي ))

(( ماحبها كبرتني ))



هذي مقاطع من تحلطم بعض امهات اليوم من اهلي ورفيجاتي !!!


مشكلة بعض بناتنا يبون كل شي بوقت واحد

 تتزوج

تحمل

تـولد

وبنفس الوقت

مايتغير عليها شي كونها بنت وتشوق وللحين مايبين عليها لا الزواج ولا الأمومه !!

الامومه نعمة كبيرة ومسؤلية ورعاية واحاطة واهتمام

انتي اتخذتي قرار الزواج يعني طبيعي فكرة الامومه تكون موجودة ومتوقعه لانها وحده من تبعات الزواج الي لهطتي عليه وبغيتي تموتين لو ماحصلتي ريل !!

هالنوع من البنات وجود زوج يكمل الصورة الاجتماعية عندها اهم بوايد من ان الزوج يكملها اهيا وبالتالي وجود الاطفال اهوا البرواز للعائلة السعيد .


والاداة المستخدمة ل show يوم اليمعه الظهر ب Dean & deluca وجودها ذاك اليوم واهيا مع الريل والبيبي واهيا بالشكل الي IN يرضي غرورها , ويريحها نفسيا وهذي نعمة , والنعمة تستوجب الشكر .

حلو الوحدة تهتم بعمرها ووايد بعد مو شويه وتواكب كل يديد هذا حقها محد يعترض وشي طبيعي ومفروض بس  الاعتدال حلو والتوازن هم مطلوب ,الي يعور القلب انها ماتقصر الا مع الشي الي مفروض ياخذ حقه كامل !

فاهمين اذا اشترت حق بنتها ملابس ولبستها باند ورزتها معاها 10 دقايق جدام الناس وتالي تقطها على الخدامه خلص دورها كأم وخلص دورالكومبارس كطفل .

وبعدين منو الي قال انها اذا قالت انها ماتحس بامومتها مع ولدها او بنتها انها تبين طفلة !!
منو قال انها اذا شاركت  طفلها طفولته بتكون CUTE ؟!
منو قال انها اذا تحجت بتمطط الحجي والكلمات الي تنقال غلط  انها بتطلع بصورة البنت الي ماكبرت ؟؟


الأولــــى بتكون مو طبيعيه ومريـضة نفسياوتحـتاج تتعالج فــعلا .
والثانيـه ماتدري انها ودعت الطفوله من اول يوم بلوغ .
والثالثــة بتكون معاقة ذهنيا .

عيــب والله عيــب

المشكلة اهما مو فاهمين الجرم الي قاعدين يسونه بحقهم وحق عيالهم شنو عاقبته قاعدين يطلعون اجيال مو متربيه فعلا مو كلام .
 
لازم الوحدة تحدد اولوياتها وتعرف المهم والأهم بحياتها وتعرف توازن بينهم, لان الي قاعدين نشوفه تخبط وشي يضحك خصوصا  بالنسبه للناس الي تفهم أبعاد الامور وتقدرها عدل وتعرف السنع , والتصنع .

مايدرون ان اكثر ام شفتها مهتمه ابنتها وتشيلها وتباريها حتى واهيا معانا من غير ضجه ولا افتعال اجمل منهم بوايد وبريئة بشكل ماينوصف ونعومتها تزيد وبنتها بين ايدنها تراعيها ويعيزون يوصلون لمستواها .. !

 يقولون (( الصج يبقى والتصنف جهاله )). 


مردكم بتكبرون ويبين عليكم العمر بس للأسف ساعتها بيبين أكثر ان ماكنتوا امهات .



هناك 4 تعليقات:

سلة ميوّه يقول...

اصدقين...

كل ما الناس ايبون هالطاري
يمر في بالي شخص معين!!!
واحس
ليش كل كلام المتزوجووووون
ينطبق عليها!!!


بقشه
ياخيتي...احنا انعاني من اليهاله..
والسطحية...

اي ونسيت

الفراااااااااااااغ


ياخي هالحريم ماعندهم شي يتلهون فيه!!
وعلى قولتج
ذابحينا بهالشو..
انا مو حارني الا شي واحد
اتيي اهي وكوكشها
والخدم
وتاخذ طاولة كبيرة وتالي
عقب العرض
راحو وتمت اهي ورفيجتها
انزين نبي ال 4 كراسي شلووون؟؟؟:)

والله ياحبيبتي
كلامج درر..وحكم...
وبصراحة
مايحس بهالنعمة الا اللي فاقدها

وعساج ماتفقدين غالي ياحبيبتي...


حبي:**

بـــــقــشة يقول...

اهلا اهلا :)
اولا لما كتبته ماكنت اعني وحده معينه لان لو وحده جان رحت وحاجيتها المشكلة ان الموضوع مستفحل .

عاحبتني سالفه الكراسي :)

ومافهمت سالفه المحرومين بس الموضوع موضوع نعمة سو لازم تتقدر مو اكثر !!

om comment kuwait يقول...

هذي على الاقل طالعة مع عيالها في بعضهم حتى ما اتشوفهم تيي من الدوام و تنام و ما اتشوفهم الا بالويك اند و بع الاحيان ما اتشوفهم مع السايق و الخادمة طالعين ابروحوهم من الافينوز لين ديسكقري

و هلم جر

و المصيبة اتقول

اذبحوني اليهال احتاج اسافر

شنو اللي اذبحوج فيه اهما خليشوفونج

تعلقهم في ميري و كارمن

و صيايحمهم ليهم مو من فراغ لانج مو فاضيتلهم

------------------------------

بس مثل ما قلتي بالاول مو حاسين بالنعمة و لا يحمدون ربهم

الله يهيدهم و ايعينهم على نفسهم
:) يحرني الموضوع هذا لان صج محط اهتمامي
و مشكلة تفشت وايد

بس شنو الحل ؟؟

بـــــقــشة يقول...

الحل توازن تعرف تعطي كل شي حقه ووقته واذا ماقدرت تكون معناتها اهيا مو مستعده استعداد تام للزواج ولا مؤهله مشكلتهم البنات مايعرفون شنو زواج بالضبط جد ريل وبس !!